Romssa ja Finnmárkku fylkkagieldda ekonomiija ja kultuvrra fylkkaráđđi Ronald Wærnes illuda go beassá doarjut golbma ođđa sámi prošeavtta Finnmárkkus. Dán háve leat Álttá Sámi Giellaguovddáš, SVD Musea- ja historjásearvi Kárášjogas ja Čáhcesullo joatkkaskuvlla sámi juogus mat ožžot doarjaga prošeavttaide mat ovddemusat leat oaivvilduvvon mánáide ja nuoraide.
– Mu mielas lea deaŧalaš váikkuhit ahte mánát ja nuorat ožžot lasi dieđuid ja máhtuid sámi gielas, historjjás ja kultuvrras. Prošeavttat mat dál ožžot doarjaga, leat oaivvilduvvon aiddofal dása veahkkin, seammás go prošeavttain lea nanu báikkálaš ja guvllolaš vuođđu, dadjá fylkkaráđđi Ronald Wærnes (Gb).
Álttá Sámi Giellaguovddáš oažžu 50 000 kruvnnu ráhkadit ja almmuhit gihppaga mas leat sámi duodjesánit dárogillii, ja SVD Musea- ja historjásearvi Kárášjogas oažžu 50 000 kruvnnu čalmmustit Sámiid Vuorká-Dávviriid 50-jagi jagi doaimma. Čáhcesullo joatkkaskuvlla sámi juogus oažžu 6 000 kruvnnu gaskkustit dieđuid ja máhtuid árbevirolaš ealáhusas ja oahppaladdat boazogárddi Gánešnjárggas.
Giellaguovddáš gaskkusta duodjedoahpagiid dárogilli
Álttá Sámi Giellaguovddáš áigu dárogielgihppaga veagas gaskkustit sámi doahpagiid mat gullet árbevirolaš duddjomii. Gihpa galgá lassin duddjoma vuođđoterminologiijai earret eará sisdoallat govaid dujiin, muhtin goarrunteknihkain ja dábálaččamus duodjeosiin.
Musea čalmmusta 50-jagi kulturgaskkusteami
Sámiid Vuorká-Dávvirat (SVD) Kárášjogas ávvuda 50-jagi doaimma jagi 2022. Musea leai vuosttas sámi kulturinstitušuvdna mii vuođđuduvvui ja man ulbmil lea nannet sámi giela ja kulturáddejumi Norggas. Ruhtačoaggin ja báikkálaš olbmuid áŋgiruššan dagai musea álggaheami vejolažžan. Jagi 2006 rájes lea SVD ovttastahttojuvvon RiddoDuottar Museaid vuođđudussii oktan Porsáŋggu, Guovdageainnu ja Hámmerfeastta Jáhkovuona museaiguin, ja maiddái Sámi dáiddačoakkáldagain Kárášjogas. Musea hálddaša badjel 5 000 dávvira, ja geavaha sámegiela bargogiellan.
Oahppit oahpahallet sámegiela boazogárddis
Čáhcesullo joatkkaskuvlla sámi juogus áigu finahit sámegiela ohppiidis Gánešnjárgga boazogárddis Várnjárggas čakčat 2022. Doppe galget árbevirolaš ealáhusbarggut leat oassi skuvlla sámegielfágas, ja giellaoahpaheaddjit áigot badjeolbmuid oahppalattadettiin geavahit gárddástallama oahpahusa vuođđun. Ulbmil lea nannet ja lasihit ohppiid sámegiela sátneriggodaga ja searvvahit sin sámi kulturdoaimmaide.