Fylkkaráđđi mearridii čoahkkimis ođđajagimánu 17. beaivvi 2023 ođđa njuolggadusaid ortnegiidda Ruđat sámi ulbmiliidda Finnmárkkus ja Ruđat kvena/norggasuopmelaš ulbmiliidda Finnmárkkus.
Fylkkaráđđi háliida ođđa njuolggadusaiguin dahkat guvllolaš váikkuhangaskaomiid čađačuovgibun ja diehttevaččabun, ja váfistit rabas ja beaktilis ohcamušmeannudeami.
Mii lea ođas?
Deaŧalaččamus rievdadus lea, ahte dáin doarjjaortnegiin eai šat galgga leat jotkkolaš ohcanáigemearit, muhto guokte fásta jahkásaš áigemeari. Ulbmil lea dahkat doarjjaortnegiid eanet fátmmasteaddjin ja diehttevažžan ohcciide, ja maiddái čalbmoseabbon ja beaktileabbon hálddahuslaččat.
Sámi ruđat leat ožžon ohcanáigemeriid golggotmánus ja cuoŋománus. Vuosttas ohcanáigemearri ođasmahttima maŋŋil lea cuoŋománu 1. beaivvi 2023 doaibmabijuide mat čađahuvvojit jagi 2023. Dán maŋŋil gustojit jahkásaš áigemearit golggotmánu 1. beaivvi ja cuoŋománu 1. beaivvi.
Kvena/norggasuopmelaš ruđat leat ožžon ohcanáigemeriid skábmamánus ja miessemánus. Vuosttas ohcanáigemearri ođasmahttima maŋŋil lea njukčamánu 1. beaivvi 2023 doaibmabijuide mat čađahuvvojit jagi 2023. Dán maŋŋil gustojit jahkásaš áigemearit skábmamánu 15. beaivvi ha miessemánu 15. beaivvi.
Lassin leat dahkkojuvvon muhtin aiddostahttimat ja lasáhusat njuolggadusaide.
Arvvosmahttit ja láhčit dilálašvuođaid buđaldemiide
Ruđat sámi ja kvena/norggasuopmelaš ulbmiliidda leat ortnegat main sáhttá ohcat doarjaga, ja galget arvvosmahttit ja láhčit dilálašvuođaid buđaldemiide mat čatnasit guovllu sámi eamiálbmogii ja čearddalaš veahádahkii kvenaide/norggasuopmelaččaide.
Ruđat juhkkojuvvojit doaibmabijuide mat ovddidit ja nannejit sámi giela ja kultuvrra ja kvena giela ja kvena/norggasuopmelaš kultuvrra.
Doarjjaortnegat ruhtaduvvojit guvllolaš ruđaiguin, mat juolluduvvojit jahkásaččat fylkkagieldda bušeahta bokte. Jahkásaš bušeahtat lea 100 000 kruvnnu kvena/norggasuopmelaš ulbmiliidda ja 475 000 kruvnnu sámi ulbmiliidda.
Loga eambbo ruđain sámi ulbmiliida Finnmárkkus.
Loga eambbo ruđain kvena/norggasuopmelaš ulbmiliidda Finnmárkkus.