Les på norsk

–  Sámediggi lea hui duhtavaš dainna ahte Romssa ja Finnmárkku fylkkagielda nanne ovttasbarggu Sámedikkiin. Ovttasbargošiehtadus dahká vejolažžan nannet ja čalmmustahttit sámi kultuvrra, giela ja servodateallima fylkkagielddas, dadjá sámediggepresideanta Silje Karine Muotka (NSR).

– Ovttas Sámedikkiin leat mii bidjan standárdda álgoálbmotparlameantta ja regionála almmolaš orgána gaskasaš šiehtadusa govdodahkii ja čikŋodahkii, dadjá fylkkaráđijođiheaddji Bjørn Inge Mo (Bb).

Romssa ja Finnmárkku fylkkagielda lea dat guovlu gos orrot eanemus sápmelaččat. Bealit geatnegahttet iežaset nannoseappot áŋgiruššamii ja bidjat oktii searaid buoremussan sámi álbmogii.

– Lea dehálaš ahte šiehtadus dadjá juoidá veahkaválddi, givssideami ja vealaheami birra, mii lea stuora servodatváttisvuohta, lasiha fylkkaráđijođiheaddji. Maiddái sámediggepresideanta lea erenoamáš duhtavaš go dát lea sierra áŋgiruššansuorgin šiehtadusas.

Romssa ja Finnmárkku fylkkagielda ja Sámedikki dovddastit šiehtadusas ahte sis lea ovddasvástádus bohciidahttit fátmmasteaddji digaštallanklimá iežaset barggu bokte, ja doarjut dutkama ja doaibmabijuid mat eastadit sápmelaččaid veahkaválddi, givssideami ja vealaheami.

– Váttes áššit eai jávkka vaikko eat humaše daid birra. Dat leat doppe servodatdigaštallamis, juohke áidna beaivvi, dadjá fylkkaráđijođiheaddji Bjørn Inge Mo (Bb).

Oktasaš servodatmihttu

Sámedikkis lea ovdal leamaš ovttasbargošiehtadus ovddeš Romssa fylkkagielddain 2002 rájes ja ovddeš Finnmárkku fylkkagielddain 2003 rájes. 2020:s časkojuvvoje Romssa ja Finnmárkku fylkkagielddat oktii oktan fylkkagieldan. Dát mielddisbuvtti ahte dát ovttasbargošiehtadusat loahpahuvvojedje ja ráhkaduvvui sierra Sámedikki ja Romssa ja Finnmárkku fylkkagieldda gaskasaš ovttasbargošiehtadus.

Šiehtadus lea juhkkojuvvon njealji oassái. 1. oassi lea ovttasbarggu birra, 2. oassi lea sámegielaid birra, 3. oassi lea servodat- ja ealáhusovddideami birra ja 4. oassi lea sámi kultuvrra birra.

– Ođas dál lea ahte šiehtadusbealit leat defineren servodatmihtu šiehtadusas, mii dadjá juoidá dan birra ahte fátmmastit sámi giela ja kultuvrra eanaš servodatsurggiin, vai sámi servodagas ja ealáhusain lea oadjebas boahtteáigi, dadjá sámediggepresideanta Silje Karine Muotka (NSR).

– Deháleamos bargu lea loktet sámi giela. Vaikko leatge leamaš nanu doaibmabijut, de lea goitge leamaš negatiiva ovdáneapmi. Dán mii fertet jorgalahttit, dadjá fylkkaráđijođiheaddji Bjørn Inge Mo (Bb).